Seisoene

Ek het besluit om so kort stukkie oor seisoene te blog aangesien daar min dinge in ons lewe is wat so 'n invloed op ons dag-tot-dag bestaan het soos die weer.  Dink bietjie aan die mate van energie waarmee jy take benader en afhandel  op 'n winters dag vs. 'n heerlike somers dag. Wat ook al jou geval is ek is seker daar is 'n daadwerklike verskil in jou entoesiasme.  

Ek weet almal praat altyd van watse tipe “seisoen”-mens hulle is!!!! Ek is 'n soooooo ‘n somers mens en my man weer soooooo 'n winters outjie.  Dit gaan natuurlik my verstand totaal en al te bowe hoe enige mens 'n winter mens kan wees maar dis net ek.  Ek kan maar net vermoed dit het iets te doen met  ‘n belofte van ‘n paar goeie bottels rooi wyn of so iets.

Nou ja, seker omdat ek ook 'n oggend mens is, is dit die dat winter my nie aanstaan nie. Donker opstaan, bibber na die stort, donker uit die huis, donker na die werk  en dan eventueel weer donker by die huis aankom.  Alles voel grys, eintlik is alles grys, self die klere wat ons aantrek is grys, grys en dik en ongemaklik en dan laat die lae en lae jou ook nog soos 'n opgestopte wors lyk. Erger nog........die koue wil 'n mens ook net laat eet en koffie drink aanhoudend en in so n mate dat jy na die winter sonder die lae klere ook soos 'n opgestopte wors lyk, dalk net nie so grys nie.

Natuurlik het somer vir party ook maar sy slegte kant, dink net aan al daai lastige vlieë en irriterende miere as jy braai of kosmaak in die kombuis. Nie dat ek groot is op kosmaak nie maar steeds, jy begin net oor kosmaak praat dan lyk dit al of daar 'n vlieë kolonie op jou afsak.  Dan is daar natuurlik ook diegene wat nie lekker cope met hoe om daai taai en sweterige lywe van hulle te versorg nie.  Ek dink ook sommige mense se irritasievlakke styg so saam met die temperatuur. Dit opsigself veroorsaak weer onvoorspelbare uitbarstings wat jou so ontkant kan betrap soos 'n laatmiddag hoëveldse donderstorm.   Dit is maar net so, vir party mense is die somerson en seer brand net te veel om te verduur.

Dan kry jy weer die, wat as die koue sy kloue in ons landjie kom inslaan lyk dit of hulle vir die eerste keer die jaar ontwaak. Party het so ekstra huppel in hul stap en dit het niks te doen met hoe styf die serp om hul nek getrek is nie. Die meeste van hulle ook met so ‘n hengse “smile”op hul bakkies. Dis eintlik aardig. Nou verwonder ek my oor die “koue ding”  wat 'n mens so kan laat glimlag, want dit lyk kompleet of sy tande warm kry.

Die effek wat koue op party mense het, is regtig “amazing”, my man byvoorbeeld kry ’n definitiewe “energy boost” -  smile and all.  Hoe kouer hoe beter.

Dan wat van herfs en lente ? Wel die lente laat my gril, ja gril, want al om my nies en proes mense van die kamtige “stuifmeel”. Al waaroor gesprekke gaan is van die arme bloeitjies by die huis met “hooikoors”, hel kom oor julleself, kry alergex of iets,  lente is so kort en in alle geval voel dit vir my dat vir die laaste twee jaar ons die lente en herfs “geskip” het en straight van somer na winter en via versa gegaan het.

Nou ja so raak dit nou winter hier by ons en sal ‘n paar van ons maar die opgestopte "wors ding" doen, of ons nou wil of nie.

Ek groet julle met ‘n gediggie wat ek self geskryf het :    Lovies ekke

Dit maak nie saak of dit winter koud

of somer benoud

Soos die dae aanstap en die seisoene verby tol

So is ons almal geskape vir 'n spesifieke rol

Is jy 'n herfskind

Of dalk ‘n somer nimf

Wat maak dit tog saak

Ons almal word geraak

Leef jy vir die somer

Is jy dalk 'n dromer

Hou jy van winter

Of laat dit jou hinker

Daar is lewe, daar is dood

Weet net in Sy hande is ons almal groot!!